Hugo Brotzer

Em Rottumtal leit Oxahausa,
en schlemma Ort fir Kunschtbanausa!
Schee eibettet en Wald ond Flur
geits do an jedr Eck Kultur.
D Barockstroß, dia fihrt mittla dur,
vo Hektik mirkt ma it a Spur.
Dr Krumbach naus kasch medidiera,
Maläschda, Zora, ällz vrliera.
Kommsch wiedr rei, noch glaubsch, da spennsch,
du fiehlsch de wia en andra Mensch!
Kaum bisch vom Bach en d Kirch nom gloffa,
stoht dir dr ganze Hemml offa:
Gugsch rom, gugsch nauf, Mensch du bisch glei,
die Ruah, dia ledt zom Betta ei.
Uff oimol, do spielt Orgl Bach,
du wirsch vom Bsenna wiedr wach,
hosch s Gfiehl, du däbesch en dir spira:
Barock isch nix als jubiliera!